ജനകീയ ചെറുത്തുനിൽപ്പിനു മുന്നിൽ പോസ്കോ മുട്ടുമടക്കി
- ഉരുക്കു നിർമ്മാണ കയറ്റുമതിപദ്ധതിയിൽ നിന്നും പിൻമാറി
- തകർക്കപ്പെട്ടത്‌ ജനദ്രോഹ പരിപാടി
- സമരം അവസാനിക്കുന്നില്ലെന്ന്‌ അഭയ്‌ സാഹു
ഒഡീഷയിലെ ദിൻകിയ, നവ്ഗാവ്‌, കർലുജപാം മേഖലകളിലെ ആദിവാസികളും കർഷകരും അവരുടെ ചെറുത്തുനിൽപിന്‌ ഐക്യദാർഢ്യം നൽകിയ സംഘടനകളും രാഷ്ട്രീയ പാർട്ടികളും നടത്തിയ ത്യാഗോജ്ജ്വലമായ സമരമാണ്‌ ഈ വിജയത്തിലേയ്ക്ക്‌ നയിച്ചതെന്ന്‌ അഭയ്‌ സാഹു പറഞ്ഞു. പ്രകൃതിവിഭവങ്ങളും ഭൂമിയും വനങ്ങളും ജലസമ്പത്തും ഖാനികളും കൊളളയടിക്കാൻ ബഹുരാഷ്ട്ര കുത്തക കോർപ്പറേഷനുകളും ഭരണകൂടവും ആസൂത്രണം ചെയ്ത ജനദ്രോഹ പദ്ധതിയാണ്‌ തകർക്കപ്പെട്ടതെന്ന്‌ അദ്ദേഹം കൂട്ടിച്ചേർത്തു. വിഖ്യാതമായ പാരദ്വീപ്‌ തുറമുഖത്തെ തകർക്കാനും സ്വകാര്യ തുറമുഖം പണിയാനുമുളള നീക്കവും ഇതോടെ അവസാനിക്കുമെന്നാണ്‌ പ്രതീക്ഷിക്കപ്പെടുന്നത്‌. വളരെ വൈകി, വൈമുഖ്യത്തോടുളള പ്രഖ്യാപനമാണ്‌ സോളിൽനിന്ന്‌ വന്നിട്ടുളളത്‌. വൻ ജനകീയ ചെറുത്തുനിൽപിനുമുന്നിലും പിടിച്ചുനിൽക്കാനും മുന്നോട്ടുപോകാനുമുളള സകല ശ്രമങ്ങളും പരാജയമടഞ്ഞ പശ്ചാത്തലത്തിലാണ്‌ ആഗോള കുത്തകയുടെ പിൻമാറ്റം. ഐതിഹാസികമായ ചെറുത്തുനിൽപ്പ്‌ സമരവിജയത്തിന്‌ പിന്നിൽ രാജ്യത്തിനകത്തും പുറത്തും നിന്നുളള വിപുലമായ ഐക്യദാർഢ്യം വലിയ പങ്ക്‌ വഹിച്ചതായി അഭയ്സാഹു പറഞ്ഞു.
പോസ്കോയുടെ പിൻമാറ്റത്തോടെ സമരം അവസാനിക്കുന്നില്ലെന്ന്‌ പ്രതിരോധ സംഗ്രാം സമിതി നേതാവ്‌ പറഞ്ഞു. ജനങ്ങളിൽനിന്ന്‌ ബലാൽക്കാരമായി പിടിച്ചെടുത്ത ഭൂമി തിരിച്ചുനൽകണമെന്ന്‌ സമിതി സംസ്ഥാന സർക്കാരിന്‌ നോട്ടീസ്‌ നൽകും. അതിന്‌ സർക്കാർ തയാറായില്ലെങ്കിൽ ജനങ്ങൾ ഭൂമി തിരിച്ചുപിടിച്ച്‌ പരമ്പരാഗതമായി തുടർന്നുവരുന്ന വെറ്റില കൃഷി പുനരാരംഭിക്കും.
കഴിഞ്ഞ പത്ത്‌ വർഷങ്ങൾക്കുളളിൽ ചെറുത്തുനിൽപ്‌ സമരത്തിൽ പങ്കെടുത്ത ആയിരത്തി അഞ്ഞൂറിൽപ്പരം സ്ത്രീ പുരുഷൻമാർക്കെതിരെ വ്യാജമായി കെട്ടിചമച്ച ആയിരത്തിഅഞ്ഞൂറിൽപരം കേസുകളുണ്ട്‌. അവയെല്ലാം പിൻവലിക്കണം. ഈ അവശ്യങ്ങൾക്ക്‌ വേണ്ടിയുളള പോരാട്ടത്തിൽ ജനപിന്തുണയും ഐക്യദാർഢ്യവും തുടർന്നും ഉണ്ടാകണമെന്ന്‌ അഭയ്‌ സാഹു അഭ്യർഥിച്ചു.
ജനകീയ ശക്തികളുടെ വിജയം: കാനം
തിരുവനന്തപുരം: എട്ടു വർഷത്തിലേറെയായി ഒറീസയിലെ ‘പോസ്കോ’യ്ക്കെതിരെ നടന്നുവന്ന സമരത്തിന്റെ വിജയം, ജനകീയ ശക്തിയുടെ വിജയമാണെന്ന്‌ സിപിഐ സംസ്ഥാന സെക്രട്ടറി കാനം രാജേന്ദ്രൻ.
ദക്ഷിണ കൊറിയൻ ബഹുരാഷ്ട്ര കമ്പനിയായ പോസ്കോയ്ക്കു വേണ്ടി ആദിവാസി-മൽസ്യ മേഖലയിലെ പാവപ്പെട്ട ജനങ്ങളെ കുടിയൊഴിപ്പിച്ചു കൊണ്ട്‌ 4000 ഏക്കർ ഭൂമിയാണ്‌ ഒറീസ സർക്കാർ ഏറ്റെടുക്കാൻ ശ്രമിച്ചത്‌.
പുനരധിവാസമോ, പകരം ഭൂമിയോ വീടോ നൽകാതെയും, അർഹമായ നഷ്ടപരിഹാരം നൽകാതെയും ഭൂമി ഏറ്റെടുക്കുന്നതിന്‌ എതിരെയും, ആദിവാസികളേയും മൽസ്യത്തൊഴിലാളികളേയും നിർദ്ദാക്ഷിണ്യം കുടിയൊഴിപ്പിക്കുന്നതിന്‌ എതിരേയും സിപിഐ ദേശീയ കൗൺസിൽ അംഗം അഭയ്‌ സാഹുവിന്റെ നേതൃത്വത്തിലാണ്‌ ജനങ്ങൾ സംഘടിച്ച്‌ സമരരംഗത്ത്‌ ഇറങ്ങിയത്‌. സമരത്തിന്‌ നേതൃത്വം നൽകിയ അഭയ്‌ സാഹൂവിനെതിരെ വധശ്രമം വരെയുണ്ടായി. ക്രൂരമായ നിരവധി ലാത്തിച്ചാർജുകളും വെടിവെയ്പും നടന്നു. അഭയ്‌ സാഹു ഉൾപ്പെടെയുള്ള നിരവധി പാർട്ടി നേതാക്കളും ജനങ്ങളും പല പ്രാവശ്യം ജയിൽവാസം അനുഭവിക്കേണ്ടിവന്നു. വധോദ്യമ കേസുകളുൾപ്പെടെ 61 കേസ്സുകളിൽ അഭയ്‌ സാഹുവിനെ പ്രതി ചേർത്ത്‌ പോലീസ്‌ കള്ളകേസ്‌ എടുത്തു. ജനങ്ങളുടെ കൃഷി നിരവധി പ്രാവശ്യം വെട്ടി നശിപ്പിച്ചു. കമ്മ്യൂണിസ്റ്റ്‌ പാർട്ടിയും എഐടിയുസിയും സമരത്തിന്‌ നേതൃത്വം നൽകി. എല്ലാ വെല്ലുവിളികളേയും നേരിട്ട്‌ ഭൂമിക്കു വേണ്ടിയുള്ള പോരാട്ടത്തിൽ ഉറച്ചുനിന്ന്‌ വിജയം നേടിയ പ്രക്ഷോഭകാരികളെ കാനം രാജേന്ദ്രൻ പ്രസ്താവനയിൽ അഭിനന്ദിച്ചു.
പോസ്കോ കമ്പനി ഒറീസ്സയിൽ ആരംഭിക്കാനിരുന്ന പദ്ധതി ജനകീയ പ്രതിരോധത്തെ തുടർന്ന്‌ ഉപേക്ഷിക്കുന്നതായി കമ്പനി ഔദ്യോഗികമായി പ്രഖ്യാപിക്കുകയായിരുന്നു. കുത്തക കമ്പനികൾക്കു വേണ്ടി സാധാരണക്കാരായ കർഷകരുടെ ഭൂമി യഥേഷ്ടം ഏറ്റെടുക്കാൻ കഴിയുന്ന തരത്തിൽ ലാന്റ്‌ അക്വിസിഷൻ നിയമം ഭേദഗതി ചെയ്യുന്ന കേന്ദ്ര സർക്കാരിന്റെ നിലപാടുകൾക്കെതിരെ ശക്തമായി ഉയർന്നുവരുന്ന ജനകീയ സമരങ്ങൾക്ക്‌ കരുത്ത്‌ പകരുന്ന ഒന്നാണ്‌ പോസ്കോ സമരത്തിന്റെ വിജയമെന്നും കാനം പറഞ്ഞു. വിജയത്തിൽ ആഹ്ലാദിച്ച്‌ സംസ്ഥാനത്ത്‌ ഉടനീളം പ്രകടനം നടത്താൻ എല്ലാ ഘടകങ്ങളോടും കാനം പ്രസ്താവനയിൽ അഭ്യർഥിച്ചു.
